Naiz.info
Olazti

Hainbat gazte eraikin batetik zintzilikatu dira Olatzagutiko errauskailuaren aurka

Olatzagutiko Portland lantegiko errauskailua Nafarroan eman daitekeen «basakeria handiena» dela iritzi diote eta abenduaren 31ra bitarte zintzilik egongo dira gau eta egun salaketa gisa.

Altsasuko gazteak eraikinetik zintzilik egongo dira abenduaren 31ra bitarte. (3 MUGAK BATERA)
Altsasuko gazteak eraikinetik zintzilik egongo dira abenduaren 31ra bitarte. (3 MUGAK BATERA)

Olatzagutiko Portland lantegiak aurrera eraman nahi duen «inposizioa» salatu nahi dute Altsasuko gazte horiek ekimen horrekin. Ohar bidez adierazi dutenez, hondakinak erretzeari ekingo dio lantegiak UPNren Gobernuaren onespena jaso ondoren; hiri hondakinak nagusiki eta pneumatikoak, plastikoak, araztegietako lohiak ere bai.

«Arrazionaltasun aldarria egin nahi dugu», adierazi dute, eta errauskailuari baimenik ez ematea eskatzen dute, «gizakion osasunerako den arriskutsuagatik eta ekarriko lukeen aberastasun eta enplegu galeragatik».

«Udal autonomía gutxiesten duen ezohiko tresna delako Donapeako UPrS-aren kontra azaldu diren alderdi politikoei edota Tuteran edo Tafallan hondakinak erretzearen kontra agertu zirenei, hemen gauza bera egiteko eskatu nahi diegu».

Nafarroako Gobernuari «era bihurrian, amarruz beterik eta asmo txarrez tramitatu den» proiektuari baimenik ez emateko galdegin dute.