NAIZ.INFO
AZPEITIA

Urtarrilaren 15era arte oporrak eman dizkiete Azpeitiko Corrugadoseko langileei

Azpeitiko Corrugados enpresako langileak gaur goizean itzuli dira lanera, sei hilabeteko grebaren ostean. Lantegira sartu eta minutu gutxira, ordea, kalera atera dira berriz, zuzendaritzak hamar eguneko oporrak eman dizkiela-eta.

Corrugadoseko langileak, enpresaren aurrean. (Jon URBE/ARGAZKI PRESS)
Corrugadoseko langileak, enpresaren aurrean. (Jon URBE/ARGAZKI PRESS)

Azpeitiko Corrugados enpresako langileek asteazkenean jakinarazi zuten gaur itzuliko zirela lanera, sei hilabete greban egin ondoren, negoziazioari bide emateko.

7.30ak pasata Azpeitiko plazatik abiatu dira lantegira, eta 8.00ak baino lehenago iritsi dira. Sartu eta minutu gutxira, ordea, berriro atera dira kalera, urtarrilaren 15era arte oporrak eman dizkietela jakin bezain pronto, Uztarria.com atariak jaso duenez.

Enpresa batzordeko LABeko Esteban Camposek eta ELAko Imanol Arrojeriak langileei esan dietenez, enpresaren jabeetako inor ez da agertu azalpenak ematera. Behargin gutxi batzuk gaur bertan hasiko dira lanean, administrazio eta mantentze-lanak egiteko.

Zuzendaritza bilera antolatzen ari da datorren asterako enpresa batzordearekin.