NAIZ.INFO
DURANGO

Gerediagaren esanetan Goenagak «ez du zintzo jokatu» elkartearekin

Azken Azokan uste baino galera handiagoak izan dituela eta, erabaki bat baino gehiago hartu behar izan dituela azaldu du Gerediaga Elkarteak, Aiert Goenaga zuzendari postutik kentzea horien artean. Horrez gain, zuzendari ohiak elkartearekin ez duela «zintzo» jokatu salatu du.

Aiert Goenaga Durangoko Azokako zuzendari ohia, artxiboko argazki batean. (Marisol RAMIREZ/ARGAZKI PRESS)
Aiert Goenaga Durangoko Azokako zuzendari ohia, artxiboko argazki batean. (Marisol RAMIREZ/ARGAZKI PRESS)

Aiert Goenaga Durangoko Azokako zuzendariaren kargu kentzea azaltzeko prentsa ohar bat bidali du Gerediaga Elkarteak. Bertan, Azokak azken urtean uste baino galera ekonomiko handiagoak izan dituela azaldu du, nahiz eta bisitari aldetik «arrakastatsua» izan den.

Horren aurrean erabaki bat baino gehiago hartu behar izan dituztela azaldu du elkarteak, eta horien artean kokatu du Goenana zuzendaritzatik kendu izana. Horrez gain, zuzendari ohiak elkartearekin ez duela «zintzo» jokatu salatu du.

Hala ere, Goenagak eredu berria finkatzen eginiko lana goraipatu du eta Azokak bide horretan jarraituko duela adierazi du. «Azoka ez da sekula izan inoren proiektu pertsonala», gaineratu du Gerediagak oharrean.

Kulturgintzarekin jarraitzeko hautua egin dutela esan du eta, «nahiz sasoi zaila izan horretarako», kultur eragile guztiekin elkarlanean jarraituko duela azaldu du.