NAIZ.INFO
BAIONA

Bake prozesuarekin aurrera jarraitzeko deia egin du Aurore Martinek espetxetik

Duela bi hilabete bere militantzia politikoagatik espetxeratua izan zen Aurore Martinek Cathèrine Grèze eurodiputatua eta Hélène Lipietz senatarien bisita jaso du Madrilgo Soto del Real espetxean. Bake prozesuarekin aurrera jarraitzeko beharra adierazi die.

Cathèrine Greèze EE-LV alderdiko eurodiputatua eta Hélène Lipietz senataria Madrilgo Soto del Real espetxean izan dira Aurore Martini bisita egiten, Kazeta.info webguneak berri eman duenez.

Ordu eta erdiz bisitatu dute duela bi hilabete inguru espetxeratutako militante politiko abertzalea eta, ondoren legebiltzarkideek jakinarazi dutenez, onik eta itxaropentsu aurkitu dute Martin.

Horrez gain, Baionako Bake Foroaren bezperan, bake prozesuarekin aurrera jarraitzeko behar delako mezua helarazi die Aurore Martinek.

Eurodiputatu ekologistak adierazi duenez, gatazkaren konponbidea elkarrizketaren bidez etorriko da eta, era berean, Lurralde Elkargoaren aldarrikapenaren aurka Manuel Valls Barne ministro frantsesak eginiko adierazpenak arbuiatu ditu.

Bere iritziz, goiz ala beranduago Parisek bere jokabidea aldatu beharko du, euskal jendarteak adierazitako nahiari erantzunez.