«Herritarren borondate argi bati erantzunez» iritsi da Kataluniako ekimena Aralarren ustez

«Historikoa eta hunkigarria» izan da Aralarren esanetan Kataluniako Legebiltzarrak burujabetzaren aldeko adierazpena onartu izana. Horregatik, ekimena bultzatu duten alderdiak zoriondu ditu, «ERC batez ere».

NAIZ.INFO|DONOSTIA|2013/01/23

Kataluniako Legebiltzarrak burujabetzaren aldeko adierazpena onartu duela eta, agiri bat kaleratu du Aralarrek. Bertan, Iñaki Irazabalbeitia alderdiko kanpo-harremaneratako arduraduna osoko bilkura «historiko eta hunkigarrian» izan dela nabarmendu du.

Gaurko eguna «oso garrantzitsua» dela esan du Irazabalbeitiak, «demokrazian sakontzeko urrats esanguratsua eman dutelako». Hala ere, Kataluniako herritarren erabakitze eskubidea onartua izan dadin «beste urrats asko eta inportanteak» eman beharko direla adierazi du.

Zentzu horretan, Aralarrek Kataluniako gizartea zoriondu du, «herritarren borondate argi bati erantzunda heldu delako erabakitzeko eskubidea praktikan jartzeko ekimena». Ekimena bultzatu duten alderdiak zoriondu ditu, «ERC bereziki».

Europan erabakitzeko eskubidearen inguruan gauzatzen ari diren ekimenei «arretaz» begiratu behar zaiela aldarrikatu du Irazabalbeitiak, «horietatik ikasteko». Eskozian eta Katalunian ematen ari diren urratsek eragina izango dute Euskal Herrian Aralarren ustez.

ERLAZIONATUTAKO ALBISTEAK